شركة تنظيف جديدة تعمل بها نساء شرقي القدس، وتقدم أفضل الخدمات للمصالح التجارية المقدسية

"شريكتي اسمها شيرا، بس انا مرات بناديها ماموش أو حياتي. وشيرا ذاتها، بتصنع التاريخ.
القدس هي مدينة صعبة، عنجد صعبة. كلشي هون سياسي، كل حيّ مختلف كلياً عن الثاني، وبنفع الواحد يعيش فيها ٣ سنين ولسا يحس حاله سائح. واحد من هاي الأسباب هو شرقي القدس. كلنا بنعرف انه هاي الأشياء موجودة – الفقر، التمييز، النزاع، الإجرام وال "اجر هون واجر هناك"، بس طول ما الاشي هو "هناك" ومش "هون"، شو بهمّنا؟
عمّال النظافة هو عالم فظيع، مش لأنهم ناس مش مناح أو مؤهلين لا سمح الله، بس لأنه بالنهاية، وبالنسبة النا كلنا… هم أشخاص شفافين وكأنهم مش موجودين. هم كثير شفافين لدرحة أنه ٨٩٪ من عمال النظافة بشركات المقاولة بالبلد ما بحصلوا عالحد الأدنى من الشروط الي بنص عليها القانون، والاشي مش هامم حدا.
بس شيرا بهمها هذا الاشي، وهي بتسوي اشي بهالموضوع.

خلال هاي الأيام، بتم تأسيس مصلحة تجارية اجتماعية جديدة بالقدس – شركة التنظيف التعاونية. هدف هاي الشركة هو توفير خدمات تنظيف بمستوى عالي جداً للمكاتب، الشركات والمصالح التجارية. عاملات النظافة اللي رح يشتغلوا فيها هم نساء من شرقي القدس. والاشي ما بخلص لحد هون، هدول النساء رح يحصلوا بالإضافة للشغل على تدريب وتطبيق، رح يتعلموا عبري، ياخذوا ارشاد بالإدارة والتنظيم، ويحصلوا على فرصة حقيقية لحياة مختلفة اللي انولدوا فيها وعاشوها. وشيرا، بتدير كل هاي العملية.

هلقيت اسمعوا، اذا هذا المنشور رح ينتهي بأنه نمدح شيرا وبس، فإحنا ما سوينا اشي. وبالرغم من أنني بحب دائماً لما يجيني إشعار على أنه حدا حطلي لايك، بس هالمرة بدي تعملوا اشي أكبر من هيك. إذا بتفكروا منيح، أكيد رح تفكروا بحدا من العيلة أو صديق اللي بشتغل بالقدس. وممكن يكون هذا الشخص انتوا. كل محل بنشغل فيه، لازم يتم تنظيفه. فش مجال، هيك العالم بشتغل. بهاي اللحظة، في عشرات من الشركات والمؤسسات في القدس اللي بتدوّر على شركة تنظيف، ومش مبسوطين من شركة التنظيف اللي بتعاملوا معها، أو حالياً بدوّروا على مكتب جديد يستأجروه، وهون بالضبط انتوا بتدخلوا للصورة.
عندكم أو بتعرفوا شركة بدها هيك اشي؟ ادخلوا عالرابط، عبّوا بالاستمارة اسم الشركة او المؤسسة وتفاصيل التواصل.

بهاي الطريقة، قللتوا من استغلال عمال النظافة، جبتوا خدمات تنظيف أحسن لشركة مقدسية، ودعمتوا نساء شرقي القدس، وساعدتوا شيرا.
فوز لجميع الجهات، وباخذش دقيقتين من وقتكم. حتى وقت أقل من اللي أخذكم لتقرأوا هالمنشور."

◀المصدر: يائير سموليانوف
——————————–
#نساء #القدس #شركة #تنظيف
رابط المنشور الأصلي 👈https://bit.ly/357PJNX

https://www.facebook.com/198764100710651/posts/1029944497592603/